اوج پر موجِ سخن تھی کہ چلا تھا میں بھی

 لہر در لہر ہویدا ہوا کیا کیا میں بھی 

بادِ لب ریز نے نم دیکھ لیا مٹی کا 

اور پھر زعمِ نمو سے نکل آیا میں بھی 

اس کی فطرت میں نہ تھا ریگِ رواں ہو جانا 

گلِ کم رنگ بنا ہوں لبِ دریا میں بھی 

 کسمساتی ہی رہی سینہ ء گل میں تری یاد 

گوندھ آیا تری خوشبو سے سراپا میں بھی 

راس آتا ہے بگولوں کو کہاں حجرہ ء دل 

ہو کے ضو ریز چلا جانبِ صحرا میں بھی 

صدفِ صبر بکھیرے گا درِ سبز بہت 

اپنی رفتار سے پہنچا تو چنوں گا میں بھی 

 بیچ مقتل میں کوئی ٹھیس نمودار ہوئی 

بھیڑ میں گُم نہ ہوا ، زخم سا نکلا میں بھی