زاہد تری بہشت میں حوریں سہی مگر

زاہد تری بہشت میں حوریں سہی مگر 

ہم جس کو چاہتے ہیں وہ زہرہ جبیں کہاں؟

کوثر پلا کے ہم سے نہ حوریں کریں مذاق 

ہم رندِ تلخ نوش کہاں، انگبیں کہاں؟

آنکھوں نے ذرّے ذرّے پہ سجدے لُٹائے ہیں 

کیا جانے جا چھپا مرا پردہ نشیں کہاں؟

دامن کشِ نظر ہے کسی کا حریمِ ناز 

دُنیا میں آ گئی یہ بہشتِ بریں کہاں؟

سُورج کی سب سے پہلی کِرن خوشنما سہی 

لیکن تری نظر کی طرح دلنشیں کہاں؟

در ہے نہ آستاں، نہ حرم ہے نہ بُتکدہ 

یارب مچل پڑی ہے ہماری جبیں کہاں؟