لمحوں کی قید کاٹ کے صدیوں میں آ گئے

ہم لوگ خاک اوڑھ کے قبروں میں آ گئے

آ جا کہ اب تو سارا زمانہ بدل گیا

خانہ بدوش لوگ بھی شہروں میں آ گئے

مدت کے بعد آئینہ دیکھا تو رو پڑا

اندر کے درد چہرے کی جھریوں میں آ گئے

اتنی سُبُک روی سے چلی ہے یہ زندگی

رستے کے گرد باد بھی روحوں میں آ گئے

یہ کس کی یاد نے درِ دل کھٹکھٹا دیا 

دریا کہاں سے بانجھ سی آنکھوں میں آ گئے 

کس کم سخن کی خامشی پھیلی ہے صحن میں

یہ کس کے خدّ و خال گلابوں میں آ گئے

ایسی حوادثات کی لُو چل پڑی ہے یار

مخمل مزاج خاک کی بانہوں میں آ گئے

بوڑھے مورخین نے روتے ہوۓ لکھا 

آخر چراغ رات کی باتوں میں آ گئے

جانے کہاں لے جاۓ گی میثم یہ زندگی  

اب تو غبارِ راہ دریچوں میں آ گئے