پرانے داؤں پر ہر دن نئے آنسو لگاتا ہے

وہ اب بھی اک پھٹے رومال پر خوشبو لگاتا ہے

اسے کہہ دو کہ یہ اونچائیاں مشکل سے ملتی ہیں

وہ سورج کے سفر میں موم کے بازو لگاتا ہے

میں کالی رات کے تیزاب سے سورج بناتا ہوں

مری چادر میں یہ پیوند اک جگنو لگاتا ہے

یہاں لچھمن کی ریکھا ہے نہ سیتا ہے مگر پھر بھی

بہت پھیرے ہمارے گھر کے اک سادھو لگاتا ہے

نمازیں مستقل پہچان بن جاتی ہے چہروں کی

تلک جس طرح ماتھے پر کوئی ہندو لگاتا ہے

اندھیرے اور اجالے میں یہ سمجھوتہ ضروری ہے

نشانے ہم لگاتے ہیں ٹھکانے تو لگاتا ہے

نہ جانے یہ انوکھا فرق اس میں کس طرح آیا

وہ اب کالر میں پھولوں کی جگہ بچھو لگاتا ہے