مسلسل کرب میں کرنا گزارا کس کو کہتے ہیں
مسلسل کرب میں کرنا گزارا کس کو کہتے ہیں
نہیں معلوم دنیا میں خسارا کس کو کہتے ہیں
بہایا ہے لہو دل کا تِری یادوں کے دامن پر
ذرا دیکھو تو اشکوں کا یہ دھارا کس کو کہتے ہیں
یہ دنیا تو فقط مطلب کی حد تک یاد رکھتی ہے
چلو اب ہم بتاتے ہیں ہمارا کس کو کہتے ہیں
مِرے کاندھے پہ سر رکھ کر کبھی رویا نہیں کوئی
مجھے کیا علم اے دنیا سہارا کس کو کہتے ہیں
نہاں ہے راکھ کے اندر کوئی شعلہ بغاوت کا
ہوا دے کر ذرا دیکھو شرارا کس کو کہتے ہیں
ترے بن زندگی کے دن یوں ہی کٹ تو رہے ہیں پر
ہمیں سے پوچھ لو آ کر گزارا کس کو کہتے ہیں
ترےچہرےکوجی بھر کر کبھی ہم دیکھ لیں تو پھر
زمانے کو بتائیں گے نظارا کس کو کہتے ہیں
جھکی نظریں حیا کا رنگ ماتھے پر پسینہ ہے
سمجھنا ہے تو سمجھو اب اشارا کس کو کہتے ہیں
مِرے تاریک کمرے میں گھنیری رات کا عالم
مجھے کیا علم اے شب رو ستارہ کس کو کہتے ہی
انا کی پاسداری میں ترقّی کر گئے اتنی
بھلا بیٹھے محبت میں پکارا کس کو کہتے ہیںں
سخن عنبر کا جب گونجا فضاؤں میں حیا بن کر
ادب نے خود بتایا ہے منارا کس کو کہتے ہیں
Join the conversation