تانگھ بال رکھنڑی ہئی رَستہ بھال رکھنڑاں ہا
ہُنڑ اے خیال آہدا ھ تیڈا خیــال رکھنڑاں ہا
مَن دا مِتر ہانویں توں ساہ دی سِتر ہانویں توں
مَن مَنوت رکھنڑاں ہا ساہ سنبھال رکھنڑاں ہا
تیڈے کجلے نیناں کوں صاف صاف ڈِسدا پئے
تیڈی بارگاہ دے وچ کیا سوال رکھنڑاں ہا
رُل گیاں تاں کیاتھی پیابُھل گیاں تاں کیاتھی پیا
مونجھ مونجھ کُرلاندی کیا ملال رکھنڑاں ہا
کیویں گزری ساڈا کیا کیا گزرسی ساڈا کیا
اساں تیڈے پیریں تے اپنڑاں حال رکھنڑاں ہا
اساں تاں جو نیتی سے اونویں پوری کیتی سے
آپ بُڈھڑےتھی گئےہئیں دل کوں بال رکھنڑاں ہا
عــزیز شاہد سئیں