اے کیجھئی نگر ہے میڈاسانول
جو زندگی دا اَلا ای کائینی
نہ کوئی در ہے نہ کوئی ولیکھا
نہ سدھ سنیہا صدا ای کائینی
اتھاں پلوتے وی سم گئے ہن
اتھاں لباں تے دعا ای کائینی
نہ رہ گئے هنڑ اتھ مانڑ کہیں دا
سنجانڑ کیا کوئی گلہ ای کائینی
گلہ شریکیں دے نال ہوندے
گلہ تاں یاریں دے نال کائینی
شریک چہرے ونیج گئے ہن
اونویں تاں شیشے تےبھال کائینی
نہ من دے ویہڑے تے سکھ سنیڑے
اجاں تاں سنبھریا سماج کا کائینی
اجاں تاں روح دے روسیمے ہن پئے
اجاں او دل دی محتاج کائینی
اتھاں تاں پتریں دی روزی کائینی
اتھاں تاں دھیریں دا ڈاج کائینی
اتھاں قلم دے وی سر قلم ہن
اتھاں آلاونڑ رِواج کائینی
اساکوں سدھ ہے اساں الیسوں
تاں نال سانجھا شعور کھلسی
توڑیں جو کنڈیاں دی شاخ ہوسی
گلاب دا پھل ضرور کھلسی
سئیں جہانگیر مخلص